Este método de rexistro permite aos veciños e veciñas acceder a todo o catálogo de servizos e trámites da Sede electrónica.

Os veciños e veciñas de Santa Comba dispoñen xa dunha Oficina de Rexistro Cl@ve. Coa creación deste novo servizo, a entidade coruñesa pon ao dispor da cidadanía a posibilidade de crear unha identidade dixital nas oficinas do seu concello e acceder así aos servizos que a Sede Electrónica lles ofrece.

O Sistema Cl@ve permite ao cidadán identificarse para realizar e asinar os seus trámites cos organismos públicos por Internet con plenas garantías de seguridade. Evítase así o desprazamento ás oficinas físicas e as restricións horarias das mesmas. Por outra banda, este sistema simplifica e unifica o acceso aos servizos públicos e elimina a necesidade de memorizar e introducir contrasinais ou claves temporais inmediatas.

Entre o amplo catálogo de servizos de administración dixital accesibles mediante identificación con Cl@ve atópanse as sedes electrónicas das entidades locais. 80 entidades locais provinciais xa teñen Sede electrónica, accesible desde o portal web que a Deputación da Coruña pon ao dispor dos cidadáns e cidadás en entidadeslocais.dacoruna.gal