O piloto define as bases para a mellora continua dos procesos operativos e estruturas organizativas de todas as entidades locais, no seu proceso de evolución cara á Administración Electrónica.

O Concello de Curtis está a levar a cabo unha fase piloto para a súa transformación, camiñando cara a un modelo de concello dixital. A duración deste piloto é de tres meses (máis outro tres de auditoría e seguimento) e supón a revisión dos seus procedementos de traballo e o seu modelo organizativo. Durante esta etapa estase acompañando aos empregados públicos co obxectivo de facilitar a súa adaptación ao proceso de cambio cara á e-Administración.

Estes seis meses tradúcense na xeración dun novo mapa de procesos en Curtis, revisado e optimizado. Tamén se traballa na adaptación da súa estrutura organizativa ás novas ferramentas dixitais e estase revisando o mapa de postos de traballo e perfís de usuario a formar.

Todo iso con vistas a optimizar os seus procesos, mellorar a atención ofrecida á cidadanía e, en definitiva, a satisfacción dos habitantes de Curtis.

As liñas de traballo que se están impulsando son:

- Transformación organizativa do Concello de Curtis: adaptando o modelo organizativo e funcional a un novo modelo dixital.

- Formación: Plan de Formación adaptado ás necesidades dos empregados do Concello, a través de distintas canles e formatos.

- Cultura organizacional: transformación cultural adaptando modelos e comportamentos en todos os niveis do Concello de Curtis.

- Persoas: adaptando a forma de traballar e de relacionarse no/co Concello.

- Seguemento: medindo a evolución de indicadores dixitais do Concello para comprender a implementación correcta do cambio.

Este piloto establece as bases para escalar a experiencia ao resto de Entidades Locais da provincia, avanzando no obxectivo de alcanzar un modelo de auténticos Concellos Dixitais.